ការពារអ្នកការពារសិទ្ធិមនុស្ស និងបរិស្ថាន

នៅក្នុងឆ្នាំ២០២៣ អង្គការFreedom Houseបានផ្តល់ចំណាត់ថ្នាក់ដល់កម្ពុជាថាជាប្រទេសមិនមានសេរីភាព ដែលទទួលពិន្ទុត្រឹមតែ២៤/១០០ ជាពិសេសអង្គការមួយនេះក៏បានផ្តល់ចំណាត់ថ្នាក់ដោយកម្ពុជាទទួលបានពិន្ទុត្រឹមតែ៥/៤០ស្តីពីសិទ្ធិនយោបាយ និងពិន្ទុ១៩/៦០ស្តីពីសេរីភាពពលរដ្ឋ។ បន្ថែមលើសពីនេះទៅទៀត អង្គការតម្លាភាពអន្តរជាតិបានផ្តល់ចំណាត់ថ្នាក់កម្ពុជាទី១៥០/១៨០ប្រទេស ដែលជាប្រទេសដែលមានអំពើពុករលួយខ្លាំងបំផុតមួយ។ 

​

យោងតាមទិន្នន័យរបស់អង្គការសិទ្ធិមនុស្ស LICADHO បច្ចុប្បន្ននេះកម្ពុជាមានអ្នកទោសមនសិការសរុបចំនួន៦៥នាក់ ក្នុងនោះអ្នកទោសនយោបាយចំនួន៣៥នាក់ អ្នកទោសជាសកម្មជនបរិស្ថានចំនួន៥នាក់ សហជីពចំនួន២នាក់ សកម្មជនដីធ្លីចំនួន២នាក់ និងអ្នកទោសផ្សេងៗទៀតចំនួន២១នាក់។ 

​

ដើម្បីឆ្លើយតបទៅនឹងស្ថានភាពដ៏គួរឲ្យបារម្ភមួយនេះ PED បានផ្តួចផ្តើមរៀបចំចុះក្រងក្រងនូវប្រវត្តិរបស់អ្នកការពារបរិស្ថាន និងសិទ្ធិមនុស្ស នៅក្នុងគោលបំណងដើម្បីទទួលស្គាល់នូវវីរភាព ផ្តល់កិត្តិយសទៅលើការលះបង់ និងកិច្ចខិតខំប្រឹងប្រែងរបស់សកម្មជនទាំងអស់នោះនៅក្នុងបុព្វហេតុដើម្បីសង្គមជាតិ។ គម្រោងចុះចងក្រងនេះផ្តោតជាពិសេសទៅលើរឿងរ៉ាវតស៊ូ និងភាពជោគជ័យរបស់ពួកគេ បញ្ហាប្រឈមនានាផងដែរ ដើម្បីបោះពុម្ពផ្សាយ និងចែករំលែកនៅលើបណ្តាញទំនាក់ទំនងសង្គមរបស់យើងទៅកាន់សាធារណជន។ 

​

បន្ថែមលើសពីនេះទៅទៀត គម្រោងមួយនេះក៏នឹងប្រមូលនូវទិន្នន័យសំខាន់ៗផ្សេងៗនៃសកម្មជនវ័យក្មេង ដើម្បីងាយស្រួលទំនាក់ទំនងទៅកាន់ក្រុមគ្រួសាររបស់ពួកគេ និងផ្តល់ទិន្នន័យបឋមទៅកាន់ស្ថាប័នសិទ្ធិមនុស្សពាក់ព័ន្ធដើម្បីជួយអន្តរគមន៍នៅពេលពួកគេជួបប្រទះនូវការគំរាមកំហែងណាមួយដោយសារភាពសកម្មនិយម និងការអនុវត្តសិទ្ធិសេរីភាពស្របតាមច្បាប់។ ​

​

រាល់ទិន្នន័យដែលផ្តល់ដោយអ្នកការពារបរិស្ថាន និងសិទ្ធិមនុស្ស នឹងត្រូវរក្សាទុកជាសំងាត់ និងបោះពុម្ពផ្សាយនៅពេលទទួលបានការយល់ព្រមពីពួកគេតែប៉ុណ្ណោះ បន្ទាប់ពីបានវិភាគរួចរាល់នូវហានិភ័យផ្សេងៗ។ ទិន្នន័យទាំងនោះត្រូវបានប្រមូលតាមរយៈសំឡេង វីដេអូ និងការសរសេរ។ 

​

ការងារដ៏មានមោទនភាពមួយរបស់ពួកយើង គឺអង្គការPEDបានចូលរួមគាំទ្រជាថវិកា បច្ចេកទេស​ និងនិពន្ធ នៅក្នុងការបោះពុម្ពផ្សាយសៀវភៅដែលនិយាយអំពីជីវភាពរស់នៅរបស់សកម្មជនបរិស្ថាននៅក្នុងពន្ធនាគារដែលមានចំណងជើងថា "មនុស្សដែលគេយកទៅកែប្រែ"។ សៀវភៅមួយនេះត្រូវបានទទួលស្គាល់ និងផ្សព្វផ្សាយនៅលើបណ្តាញសារព័ត៌មានឯករាជ្យជាភាសាខ្មែរដែលរួមមាន RFA Khmer, RFI Khmer។ 

​​

​