គាំទ្រយុទ្ធនាការណ៍របស់យើង

ដោយសារការរឹតដ្បិតមកលើសហគមន៍មូលដ្ឋាន សកម្មជន និងអង្គការសង្គមស៊ីវិលមិនឲ្យចុះធ្វើសកម្មភាពចូលរួមការពារព្រៃឈើនៅតាមតំបន់ការពារធម្មជាតិតាំងពីឆ្នាំ២០១៩មក អង្គការPEDមានភាពលំបាកនៅក្នុងការចុះទៅប្រមូលទិន្នន័យដែលទាក់ទងទៅនឹងបទល្មើសព្រៃឈើ ម្ល៉ោះហើយយើងបានរៀបចំដំណោះស្រាយថ្មីតាមរយៈការពង្រឹងសមត្ថភាពរបស់សហគមន៍មូលដ្ឋានឲ្យចេះពីរបៀបប្រើប្រាស់ជីភីអេស និងរបៀបប្រមូលទិន្នន័យអំពីបទល្មើសព្រៃឈើ។ តាមរយៈវគ្គបណ្តុះបណ្តាលមួយនេះបានផ្តល់ជាគុណប្រយោជន៍ដល់សហគមន៍ដូចជា៖ 

•  ធ្វើឲ្យប្រសើរឡើងនូវការស្គាល់ទិសដៅច្បាស់លាស់៖ នេះគឺជាចំណេះមូលដ្ឋានសម្រាប់សមាជិកសហគមន៍ជាយុវជនវ័យក្មេងដែលមានបទពិសោធន៍តិចតួចនៅក្នុងព្រៃ ព្រមទាំងជួយដល់សមាជិកសហគមន៍ទាំងមូលឲ្យយល់ច្បាស់អំពីទិសដៅ និងការប្រើប្រាស់ផ្លូវព្រៃប្រកបដោយសុវត្ថិភាព និងមានប្រសិទ្ធិខ្ពស់នៅពេលចុះល្បាត។ 

• ការប្រមូល និងវិភាគទិន្នន័យ៖ វគ្គបណ្តុះបណ្តាលមួយនេះអាចជួយឲ្យសហគមន៍កត់ត្រា និងប្រមូលទិន្នន័យប្រកបដោយភាពសុក្រិត្យអំពីបទល្មើសព្រៃឈើ និងតំបន់ដែលមានសក្តានុពល។ ទិន្នន័យទាំងនេះអាចត្រូវបានប្រើប្រាស់ដើម្បីតស៊ូមតិធ្វើឲ្យប្រសើរឡើងនូវការអនុវត្តគោលនយោបាយនានារបស់ក្រសួងបរិស្ថាន។ 

• ការពង្រឹងសមត្ថភាព៖ ការផ្តល់វគ្គបណ្តុះបណ្តាលនេះបានជួយពង្រឹងសមត្ថភាព និងអំណាចរបស់សហគមន៍ជាមួយជំនាញដ៏មានសារៈសំខាន់ ចំណេះដឹង និងពង្រឹងលទ្ធភាពនៅក្នុងការគ្រប់គ្រង និងអភិរក្សព្រៃឈើប្រកបដោយប្រសិទ្ធិភាព ព្រមទាំងដើម្បីជាមូលដ្ឋាននៅក្នុងការតស៊ូមតិជាមួយស្ថាប័នពាក់ព័ន្ធផងដែរ។ 

សរុបមកវគ្គបណ្តុះបណ្តាលនេះមានសារៈសំខាន់ខ្លាំងណាស់នៅក្នុងការលើកកម្ពស់ការគ្រប់គ្រងធនធានធម្មជាតិប្រកបដោយសុវត្ថិភាព ប្រសិទ្ធិភាព និងជួយជម្រុញឲ្យការអភិវឌ្ឍនៅតាមតំបន់ការពារធម្មជាតិប្រកបដោយនិរន្តរភាពផងដែរ។