តុលាការនឹងបន្តបើកសវនាការលើការស្នើនៅក្រៅឃុំរបស់សកម្មជនកិច្ចព្រមព្រៀងសន្តិភាពទីក្រុងប៉ារីសនៅថ្ងៃទី០៣ ខែកញ្ញា
- Miss. Hok Kimleang
- Aug 27
- 1 min read
Updated: Aug 29
សាលាដំបូងរាជធានីភ្នំពេញនៅថ្ងៃទី២៧ ខែសីហា បានបើកសវនាការលើសំណុំរឿង«ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»ពាក់ព័ន្ធរឿងកិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម (CLV-DTA)
របស់សកម្មជនកិច្ចព្រមព្រៀងសន្តិភាពទីក្រុងប៉ារីសលោក ស្រ៊ុន ស្រ៊ន លោក សាន សិទ្ធ និងកញ្ញា ភឹង សោភា ព្រមទាំងសកម្មជនសង្គមលោក ធែល ធីលែន។
ក្នុងបន្ទប់សវនាការសហមេធាវីរបស់សកម្មជនកិច្ចព្រមព្រៀងសន្តិភាពទីក្រុងប៉ារីសបានលើកយកមាត្រា៣០៧នៃក្រមនីតិវិធីព្រហ្មទណ្ឌដើម្បីស្នើដោយផ្ទាល់មាត់ឱ្យតុលាការជំនុំជម្រះលើសំណើសុំនៅក្រៅឃុំ មុនពេលជំនុំជម្រះលើអង្គសេចក្ដីនៃសំណុំរឿងដោយមេធាវីសំអាងថា ការឃុំខ្លួនកូនក្តីរបស់លោកបានធ្វើឡើងលើសពីនីតិវិធីច្បាប់។
លោកបន្ថែមថា កូនក្ដីរបស់លោកកំពុងមានបញ្ហាសុខភាព ដោយសារការរស់នៅក្នុងបន្ទប់ឃុំឃាំងចង្អៀតណែន និងគ្មានអនាម័។ បន្ទាប់មកចៅក្រមជំនុំជម្រះបានទុកពេលឱ្យសកម្មជនកិច្ចព្រមព្រៀងសន្តិភាពទីក្រុងប៉ារីសលើកឡើងពីហេតុផលស្នើសុំនៅក្រៅឃុំរបស់ខ្លួន។
លោក ស្រ៊ុន ស្រ៊ន បានលើកឡើងថា តុលាការគួរតែដោះលែងលោកឱ្យមានសេរីភាព ពីព្រោះលោកមិនបានប្រព្រឹត្តខុសច្បាប់ដូចការចោទប្រកាន់របស់តុលាការនោះឡើយ ដោយលោកផ្សព្វផ្សាយអំពីកិច្ចព្រមព្រៀងសន្តិភាពទីក្រុងប៉ារីសនេះ គឺក្នុងគោលបំណងឱ្យពលរដ្ឋស្វែងយល់អំពីច្បាប់តែប៉ុណ្ណោះ។ ចំណែកកញ្ញា ភឹង សោភា ថ្លែងនៅចំពោះមុខចៅក្រមថា កញ្ញាបានទទួលលិខិតបញ្ជាក់ពីអត្តចរិតល្អរបស់កញ្ញាពីមន្ត្រីពន្ធនាគារ ហើយប្រសិនបើកញ្ញាពិតជាមានចេតនាញុះញង់ដូចការចោទប្រកាន់របស់តុលាការ នោះមន្ត្រីពន្ធនាគារក៏មិនចេញលិខិតបញ្ជាក់ពីអត្តចរិតល្អឱ្យកញ្ញានោះដែរ។ ដោយឡែកលោក សាន សិទ្ធ បានថ្លែងថា តុលាការគួរតែដោះលែងលោកឱ្យនៅក្រៅឃុំ ពីព្រោះលោកកំពុងមានបញ្ហាសុខភាពធ្ងន់ធ្ងរ ជាពិសេសលោកឈឺត្រចៀកដែលអាចប៉ះពាល់ដល់ការស្តាប់របស់លោក។
សវនាការលើកនេះមន្ត្រីពន្ធនាគារក៏បានដឹកសកម្មជនសង្គមលោក ធែល ធីលែន មកចូលរួមសវនាការក្នុងសំណុំរឿង«ញុះញង់»នោះផងដែរ។ ពាក់ព័ន្ធរឿងរបស់លោក ធែល ធីលែន តុលាការបានរក្សាការចោទប្រកាន់លោកពីបទ«ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»ក្នុងអំឡុងពេលលោកបានបង្ហោះវីដេអូបង្ហាញកង្វល់ពីវាសនាខេត្តទាំង៤របស់ខ្មែរដែលគ្រោងដាក់បញ្ចូលទៅក្នុងកិច្ចសហប្រតិបត្តិការតំបន់ត្រីកោណអភិវឌ្ឍន៍CLV។ ភ្លាមៗ លោក ធែល ធីលែន បានបដិសេធការចោទប្រកាន់របស់តុលាការដោយលោកអះអាងថា លោកមិនបានស្គាល់លោក ស្រ៊ុន ស្រ៊ន និងញុះញង់ឱ្យពលរដ្ឋប្រឆាំងនឹងរដ្ឋាភិបាលនោះឡើយ។ លោក ធែល ធីលែន ស្នើឱ្យតុលាការដោះលែងលោកឱ្យមានសេរីភាពឡើងវិញ ដើម្បីអាចឱ្យលោកមានឱកាសទទួលបានការព្យាបាលសុខភាពរបស់លោក ពីព្រោះលោកមានបញ្ហាសុខភាព និងដួលសន្លប់ជាញឹកញាប់។
ក្នុងសវនាការនេះមានសាច់ញាតិ និងអ្នកគាំទ្រសកម្មជនកិច្ចព្រមព្រៀងសន្តិភាពទីក្រុងប៉ារីស និងមន្ត្រីអង្គការសង្គមស៊ីវិលចូលរួមឃ្លាំមើលប្រមាណជាង៧០នាក់ផងដែរ។
មន្ត្រីគោលនយោបាយ និងតស៊ូមតិនៃអង្គការភាពជាដៃគូដើម្បីបរិស្ថាន និងការអភិវឌ្ឍ ហៅកាត់ថាPED ដែលបានចូលរួមឃ្លាំមើលសវនាការ កញ្ញា ហេង គឹម សួរ យល់ឃើញថា សកម្មភាពដែលក្រុមសកម្មជនកិច្ចព្រមព្រៀងសន្តិភាពទីក្រុងប៉ារីសលោក ស្រ៊ុន ស្រ៊ន បានធ្វើគឺនៅក្នុងគោលបំណងបារម្ភអំពីជោគវាសនារបស់ជាតិ និងគិតគូរពីបញ្ហាជាតិតែប៉ុណ្ណោះ។ កញ្ញាស្នើឱ្យតុលាការគួរតែពិចារណាទម្លាក់ចោលបទចោទប្រកាន់ និងដោះលែងពួកគាត់ឱ្យមានសេរីភាពឡើងវិញ។
គិតមកទល់ពេលនេះតុលាការបានឃុំខ្លួនសកម្មជនកិច្ចព្រមព្រៀងសន្តិភាពទីក្រុង ប៉ារីសលោក ស្រ៊ុន ស្រ៊ន កញ្ញា ភឹង សោភា និងលោក សាន សិទ្ធ មានរយពេលៈជាង១ឆ្នាំមកហើយ បន្ទាប់ពីសមត្ថកិច្ចបានចាប់ខ្លួនពួកគេកាលពីថ្ងៃទី២៤ ខែកក្កដា ឆ្នាំ២០២៤ បន្ទាប់ពីលោក ស្រ៊ុន ស្រ៊ន បានបង្ហោះវីដេអូនៅលើបណ្ដាញសង្គមអំពីការបញ្ចូលខេត្តចំនួន៤របស់ខ្មែរដើម្បីអភិវឌ្ឍជាមួយវៀតណាម និងឡាវ (CVL) មានគុណសម្បត្តិ និងគុណវិបត្តិអ្វីខ្លះ?
ដោយឡែកសកម្មជនសង្គមលោក ធែល ធីលែន ត្រូវបានសមត្ថកិច្ចខេត្តកណ្ដាលចាប់ខ្លួនជាលើកទី២ កាលពីថ្ងៃទី២៤ ខែកក្កដា ឆ្នាំ២០២៤ ក្រោយពេលលោកបង្ហាញកង្វល់ពីវាសនាខេត្តទាំង៤របស់ខ្មែរ ដែលគ្រោងដាក់បញ្ចូលទៅក្នុងគម្រោងកិច្ចសហប្រតិបត្តិការតំបន់ត្រីកោណអភិវឌ្ឍន៍CLV។ បច្ចុប្បន្ននេះលោក ធែល ធីលែន កំពុងជាប់ពន្ធនាគារព្រៃសក្នុងរាជធានីភ្នំពេញ។
ថ្វីត្បិតតែកម្ពុជាបានប្រកាសដកចេញពីគម្រោងកិច្ចសហប្រតិបត្តិការតំបន់ត្រីកោណអភិវឌ្ឍន៍CLV ក្ដីក៏រដ្ឋាភិបាលនៅមិនទាន់ដោះលែងសកម្មជនដែលកំពុងជាប់ឃុំទាំងនោះឱ្យមានសិទ្ធិសេរីភាពឡើងវិញនោះដែរ៕
Comments