លោក ធី ថន ពីយុវជនធម្មតាក្លាយជាអ្នកទាមទារឱ្យមានការគោរពសិទ្ធិមនុស្ស
- PED Cambodia
- Aug 7
- 1 min read
Updated: Aug 28
លោក ធី ថន គឺជាយុវជនមួយរូបក្នុងចំណោមយុវជនសកម្មជាច្រើនដែលតស៊ូមតិឱ្យមានការគោរពសិទ្ធិមនុស្ស និងទាមទារឱ្យតុលាការដោះលែង លោក កើត សារ៉ាយ។ អាជ្ញាធរបានចាប់ខ្លួនលោកដាក់ពន្ធនាគារកាលពីថ្ងៃទី១៨ ខែសីហា ឆ្នាំ២០២៤ ក្រោមបទចោទ«រួមគំនិតក្បត់»។
តើលោក ធី ថន មានប្រវត្តិបែបណាខ្លះ?
លោក ធី ថន គឺជាយុវជនមួយរូបមានឆន្ទៈមោះមុត ក្លាហាន និងមានគោលជំហររឹងមាំដើម្បីទាមទារឱ្យតុលាការដោះលែងលោក កើត សារ៉ាយ។ កាលនៅមានសេរីភាពយុវជនរូបនេះ បង្ហាញពីការប្ដេជ្ញាចិត្តចូលរួមការងារសង្គមបើទោះបីជាប្រឈមនឹងគុកច្រវាក់យ៉ាងណាក្ដី។
យុវជន ធី ថន មានអាយុ២៤ឆ្នាំ។ លោកកើតនៅឆ្នាំ២០០១ នៅភូមិបន្ទាយតូច ឃុំ ភ្នំបាត ស្រុកពញាឮ ខេត្តកណ្ដាល។ ថនគឺជាកូនទី៣នៅក្នុងចំណោមបងប្អូនបង្កើតចំនួន៥នាក់ ដែលមានឪពុកម្ដាយជាកសិករ។ ដោយសារតែជីវភាពគ្រួសារក្រីក្រ និងមានឪពុកម្ដាយជាកសិករផងនោះ យុវជនរូបនេះបានតស៊ូរៀនសូត្ររហូតប្រឡងជាប់បាក់ឌុបនៅវិទ្យាល័យហ៊ុនសែនព្រះធម្មស្រះ ក្នុងខេត្តកណ្ដាល កាលពីឆ្នាំ២០២០ ហើយមកបន្តការសិក្សានៅសាកលវិទ្យាល័យភូមិន្ទភ្នំពេញ ផ្នែកគីមីចំណីអាហារ។
អំឡុងពេលសិក្សានៅសាកលវិទ្យាល័យក្នុងរាជធានីភ្នំពេញថន តែងតែឆ្លៀតចូលរួមការងារសង្គមជាមួយអង្គការសង្គមស៊ីវិល និងធ្វើការងារស្ម័គ្រចិត្តជាមួយសមាគមសម្ពន្ធនិស្សិតបញ្ញវន្តខ្មែរដើម្បីស្វែងយល់ពីស្ថានភាពរស់នៅរបស់ពលរដ្ឋ។ ក្រៅពីនេះថន តែងចូលរួមផ្សព្វផ្សាយអំពីបញ្ហាបរិស្ថានតាមរយៈការ ចែកខិត្តប័ណ្ណកោះកុងក្រៅ ការដាក់ញាតិទៅក្រសួងបរិស្ថាន ព្រមទាំងចូលរួមធ្វើយុទ្ធការស្វែងរកយុត្តិធម៌ឱ្យវីរជនដែលបានលះបង់ជីវិតដើម្បីបុព្វជាតិដូចជា លោក ឈុត វុទ្ធី និងលោកបណ្ឌិត កែម ឡីជាដើម។
ឪពុកលោក ធី ថន គឺលោក មឿន ធី ថ្លែងថា កូនប្រុសរបស់លោកគឺជាមនុស្សស្លូតបូត និងចេះជួយយកអាសាអ្នកដទៃ។ បុរសវ័យជិត៥០ឆ្នាំរូបនេះយល់ឃើញថា កូនប្រុសរបស់លោកមិនបានប្រព្រឹត្តិខុសច្បាប់ដូចការចោទប្រកាន់របស់តុលាការឡើយ។
យុវជន ធី ថន ចាប់ផ្ដើមចូលរួមការងារលើកកម្ពស់សិទ្ធិមនុស្ស បរិស្ថាន និងជំរុញឱ្យមានយុត្តិធម៌សង្គមកាន់តែសកម្ម ក្រោយពីអាជ្ញាធរចាប់ខ្លួនប្រធានសមាគមសម្ពន្ធនិស្សិតបញ្ញវន្តខ្មែរគឺលោក កើត សារ៉ាយ ដាក់ពន្ធនាគារជាលើកទី២ កាលពីថ្ងៃ០៥ ខែមេសា ឆ្នាំ២០២៤ ក្រោយលោកបញ្ចេញមតិជុំវិញការប្រើហិង្សាលើពលរដ្ឋនៅខេត្តព្រះវិហារ។ បន្ទាប់មក កាលពីថ្ងៃទី០២ ខែកក្កដា អាជ្ញាធរបានចាប់ខ្លួនអនុប្រធានសមាគមសម្ពន្ធនិស្សិតបញ្ញវន្តខ្មែរមួយរូបទៀតគឺ លោក យីម លាងហ៊ី ដាក់ពន្ធនាគារដាច់ដោយឡែកពីគ្នា។ យុវជន ធី ថន បានក្លាយជាប្រធានស្ដីទីសមាគមសម្ពន្ធនិស្សិតបញ្ញវន្តខ្មែរ ក្រោយសមាជិកភាពបោះឆ្នោតជ្រើសយកយុវជនរូបនេះ។
ផ្ដើមចេញពីការមើលឃើញពីភាពអយុត្តិធម៌ដែលកើតឡើងចំពោះលោក កើត សារ៉ាយ និងពលរដ្ឋបែបនេះទើបយុវជន ធី ថន ចូលរួមយ៉ាងសកម្មទាមទារឱ្យតុលាការដោះលែង និងទម្លាក់ចោលការចោទលើលោក កើត សារ៉ាយ។ ទីបំផុតទៅ នៅថ្ងៃទី១៨ ខែសីហា ឆ្នាំ២០២៤ សមត្ថកិច្ចបានចុះបិទទីតាំងសមាគមសម្ពន្ធនិស្សិតបញ្ញវន្តខ្មែរ និងចាប់ខ្លួនលោក ធី ថន រួមទាំងយុវជនចំនួន៣នាក់ផ្សេងទៀតដោយចោទប្រកាន់ពីបទ«រួមគំនិតក្បត់»ពាក់ព័ន្ធនឹងព្រឹត្តិការណ៍១៨សីហារឿងកិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម (CLV-DTA)។ បច្ចុប្បន្ននេះមានតែលោក ធី ថន ម្នាក់ប៉ុណ្ណោះដែលកំពុងជាប់ឃុំនៅពន្ធនាគារព្រៃស។
កាលពីថ្ងៃទី២៦ ខែឧសភា តុលាការកំពូលបានច្រានចោលបណ្ដឹងស្នើសុំបដិសេធសេចក្ដីសម្រេចឃុំខ្លួនបណ្ដោះរបស់លោក ធី ថន ក្រោមបទចោទ«រួមគំនិតក្បត់» បន្ទាប់ពីសាលាដំបូងរាជធានីភ្នំពេញបានឃុំខ្លួនបណ្ដោះអាសន្នរយៈពេល៦ខែរួចមកហើយ។
យុវជនសកម្មការងារសង្គម លោក ថន ធន លើកឡើងថា លោកគោរពនូវវីរភាព និងការលះបង់របស់លោក ធី ថន ជុំវិញទាមទារឱ្យមនយុត្តិធម៌សង្គម។ លោកបន្តថា ថន គឺជាមនុស្សចេះជួយអ្នកដទៃ និងលើកទឹកចិត្តយុវជនឱ្យក្លាហានហ៊ាននិយាយការពិតដើម្បីយុត្តិធម៌សង្គម។
បើទោះបីជាលោក ធី ថន នៅវ័យក្មេងក្ដី ប៉ុន្តែលោកមានឆន្ទៈ និងក្ដីសុបិនចង់ឃើញអ្នកនយោបាយគ្រប់និន្នាការទាំងអស់រួបរួមដើម្បីកសាងប្រទេសជាតិ ព្រមទាំងគោរពសិទ្ធិមនុស្សឱ្យបានពេញលេញ៕
Comments